Reykjavík 25. mars 2009: Icelandair, dótturfélag Icelandair Group, mun hefja beint áætlunarflug fjórum sinnum í viku milli Íslands og Seattle á vesturströnd Bandaríkjanna þann 22. júlí næstkomandi.
• Viðskiptatækifæri sem gefst vegna breytinga á alþjóðamörkuðum
• Fellur inn í leiðakerfi sem byggir á legu landsins í beinni flugleið milli Norður-Ameríku og Norður-Evrópu
• Hagkvæmar Boeing 757 þotur Icelandair henta einstaklega vel í flugið
• Skapar gjaldeyristekjur, allt a eitt hundrað atvinnutækifæra og eflir ferðaþjónustuna
Birkir Hólm Guðnason, framkvæmdastjóri Icelandair:
“Icelandair rekur öflugt leiðakerfi og velgengi þess byggir á stöðugri útsjónarsemi, þróun og aðhaldi. Við brotthvarf SAS af markaðinum milli Skandinavíu og Seattle í sumar myndast tækifæri fyrir Icelandair, því vegna staðsetningar landsins getum við nýtt Boeing 757 þotur í flugið, en þær eru mun hagkvæmari en þær breiðþotur sem jafnan fljúga milli Seattle og Evrópu. Með millilendingu hér á landi dreifast farþegar til og frá fjölmörgum Evrópuborgum, líkt og í öðru tengiflugi félagsins. Samkeppnishæfni Icelandair á leiðinni milli Seattle og Evrópu er því góð og við getum boðið 3-4 klst. styttri flugtíma en aðrir geta frá höfuðborgum Norðurlandanna og fleiri stöðum. Jafnframt erum við í samstarfi við Alaska Airlines, sem er stærsta flugfélagið í Seattle, og því bjóðum við samdægurs góðar áframtengingar til borga eins og Las Vegas, Los Angeles, San Francisco og fleiri.
Þetta flug undirstrikar styrk og sveigjanleika Icelandair. Með starfsemi á fjölmörgum mörkuðum í Evrópu og Norður-Ameríku heldur Icelandair uppi öflugum samgöngum milli Íslands og umheimsins jafnvel þó dragi mjög úr utanferðum Íslendinga tímabundið. Við störfum í raun á þremur ólíkum mörkuðum, heimamarkaði á Íslandi, ferðamannamarkaði til Íslands og alþjóðamarkaðinum milli Evrópu og Norður-Ameríku. Við núverandi efnahagsaðstæður eru áherslurnar á að fá ferðamenn til landsins og á þátttöku í alþjóðafluginu. Farþegarnir í Seattlefluginu koma langflestir af alþjóðamarkaði. Við gerum ráð fyrir að aðeins um 7% farþeganna verði Íslendingar, en um 93% verða útlendingar – að hluta ferðamenn til Íslands og að hluta fólk á ferð milli heimsálfa.
Nú eru almennt erfiðir tímar í alþjóðaflugi, en Icelandair hefur áður synt gegn straumnum. Eftir hryðjuverkaárásirnar 11. september 2001 dró mjög úr eftirspurn í flugi, en Icelandair greip tækifæri sem gáfust og á árinu 2002 náði félagið sínum besta rekstrarárangri á meðan önnur flugfélög börðust í bökkum. Icelandair gerði á fyrri hluta síðasta árs umtalsverðar hagræðingaraðgerðir í ljósi versnandi efnahagsástands og við fall íslensku bankanna breytti félagið um áherslur í sölustarfi sínu. Bættur kostnaðarastrúktúr skapar sóknarfæri og afkoma fyrstu mánuði ársins er betri en áætlanir gerðu ráð fyrir. Rekstur Icelandair er því traustur.
Það er sérstakt ánægjuefni að þessi ákvörðun kallar á aukna starfskrafta í fluginu og við gerum ráð fyrir að með því skapist beinn starfsvettvangur fyrir allt að eitt hundrað starfsmanna auk þess sem aukin ferðamannastraumur til Íslands skapar mikilvæg störf um allt land. Þar að auki er Seattle mjög aðlaðandi borg og skemmtileg heim að sækja, auk þess sem hún er systurborg Reykjavíkur”
Flogið verður fjórum sinnum í viku, frá Íslandi á mánudögum, miðvikudögum, föstudögum og laugardögum, brottför kl 17.00 og koma til Seattle kl 16.45. Frá Seattle verður flogið á þriðjudögum, fimmtudögum, laugardögum og sunnudögum, brottför kl 15:30 og koma til Íslands kl. 06:45
Icelandair á sér 72 ára sögu og fá alþjóðleg flugfélög eiga sér jafn langa hefð í flugi milli Evrópu og Norður-Ameríku. Nú býður félagið viðskiptavinum sínum frábæra þjónustu á þremur farrýmum, Saga Class, Economy Comfort og Economy, en í þotunum eru ný sæti og afþreyingarkerfi fyrir hvern og einn. Félagið hefur verið þáttakandi í IATA frá 1950, í AEA frá 1957 og í Flight Safety Foundation frá 1966.
Guðjón Arngrímsson
Corporate Communications
gudjon@icelandair.is
(+354) 5050 393
